Եթե Իսրայելը հարձակվի Իրանի վրա, ապա 3-4 օր հետո Ադրբեջանը կհարձակվի Արցախի վրա։ Օգոստոսի 17-ին, լրագրողների հետ հանդիպման ժամանակ այս մասին ասաց ՌԴ աշխարհաքաղաքական հիմնախնդիրների ակադեմիայի փոխնախագահ Արայիկ Սարգսյանը։ Նրա խոսքով, սա Ալիեւի կլանի միակ հնարավորությունն է։

«Ադրբեջանն արդեն ձեռք է բերել С-300 զենիթա-հրթիռային համակարգեր եւ կարող է թույլ տալ իրեն հարձակվել, չերկյուղելով իր էներգահամակարգերի համար։ Նա բաց չի թողնի իր հնարավորությունը»-նշեց Սարգսյանը։

«4 օրից Իրանում՝ Բուշեր քաղաքի մոտ, շահագործման կհանձնվի ատոմակայան, իսկ նոյեմբերի սկզբին այն կմիացվի Իրանի ներքին էներգացանցին։ Եթե այդ ժամանակի ընթացքում Իսրայելը չհարձակվի Իրանի վրա, ապա մենք կարող ենք հանգիստ շունչ քաշել»,-ասաց քաղաքագետը։ Նրա կարծիքով, այսօր Իսրայելն այդ հնարավորությունն ունի։

            «Իսրայելի հարձակողական ավիացիան մինչեւ վերջերս այնպիսի ինքնաթիռներ չուներ, որոնք կարող էին հասնել մինչեւ Իրան, ռմբակոծել եւ անմիջապես հետ վերադառնալ` առանց վերալիցքավորման։ Դրանք ամերիկյան F-15, F-16 եւ «Միրաժ» ինքնաթիռներն են։ Սակայն վերջերս Իսրայելը ԱՄՆ-ից գնել եւ շահագործում է  5-րդ սերնդի F-22 Raptor բազմանպատակային կործանիչներ, որոնք նման հնարավորություն ունեն։

Արայիկ Սարգսյանի կարծիքով,  պատերազմից խուսափելու Արցախի միակ հնարավորությունը միջազգային կառույցներին՝ Եվրամիությանը, Հաագայի միջաազգային դատարանին, ԱՊՀ համապատասխան մարմիններին դիմելն է։