NEWS.am-ի՝ հայազգի երիտասարդի եւ ադրբեջանուհու սիրո պատմության մասին հրապարակումից հետո հայտնի է դարձել, որ սիրահարված հայ ուսանողի կյանքին վտանգ է սպառնում։ Սիրավեպը Լոնդոնի հայկական եւ ադրբեջանական համայնքներում մեծ արձագանք է գտել։
Ադրբեջանական համայնքը Ադրբեջանի արտակարգ իրավիճակների նախարար Քեմալադին Հեյդարովի որդու՝ Թալեհ Հեյդարովի եւ Եվրոպայում ադրբեջանական համայնքի ղեկավարի գլխավորությամբ բողոք է հնչեցրել՝ կարծիք հայտնելով, որ երիտասարդ աղջիկը վիրավորել է ադրբեջանական ազգի ինքնությունը։ Անգամ «դավաճանին» պատժելու կոչեր են հնչել։ Ադրբեջանցիները փորձել են ներգրավել ադրբեջանուհու հորը՝ նախարարության կարգավիճակ ունեցող պետական հանձնաժողովի նախագահին, որպեսզի նա «վերջ դնի այդ խայտառակությանը»։ Նշենք, որ Մեծ Բրիտանիայում ադրբեջանցիների թիվը շուրջ 15 հազար է։

Լոնդոնի հայ համայնքի (որ բաղկացած է 20 հազար մարդուց) ներկայացուցիչները NEWS.am-ին հայտնել են, որ ադրբեջանցի մի քանի տաք գլուխներ խոստացել են սպանել երիտասարդին եւ նրա սիրելիին։ «Նրան սպառնում են։ Մենք հնարավոր հետեւանքներից խուսափելու համար, չենք ցանկանում բարձրաձայնել տղայի անունը»։ Հարցին, թե ինչպե՞ս են իրենք վերաբերում հայ եւ ադրբեջանցի երիտասարդների սիրավեպին, համայնքի ներկայացուցիչները պատասխանեցին, որ «դա նրանց անձնական գործն է, մենք իրավունք չունենք խառնվել»։

Նշենք, որ սիրահարները շարունակում են իրար հետ ապրել եւ անհրաժեշտության պարագայում պատրաստ են լքել Մեծ Բրիտանիան։